Kompanitë

Bjeshkët e Deçanit është një kompani me traditë të gjatë në bletari, e trashëguar nga brezat e mëparshëm. Në vitin 2021, kompania filloi të merret me bletari organike dhe aktualisht ndodhet në vitin e katërt të procesit të certifikimit organik. Lokacioni i zgjedhur për bletarinë organike janë Bjeshkët e Deçanit, një zonë me ajër të pastër, pa ndotje dhe larg bujqësisë intensive, ideale për prodhimin e mjaltit të pastër dhe natyral. Bjeshkët e Deçanit fokusohet ekskluzivisht në bletarinë organike dhe nuk ofron produkte konvencionale duke u përqendruar plotësisht te cilësia dhe natyraliteti i produkteve të saj

Kompania Natyra AG është një kompani private që merret me grumbullimin, kultivimin dhe përpunimin e bimëve mjekësore dhe aromatike. Veprimtarinë e saj e ka filluar që nga viti 2005, fillimisht si një biznes familjar individual, ndërsa nga viti 2022 është riorganizuar si Shoqëri me Përgjegjësi të Kufizuar (Sh.P.K.). Natyra AG njihet si kompania numër një në Kosovë dhe në rajon për prodhimin e uthullës së mollës së egër, si dhe për çajrat e paketuar në formë refuz (të lirë në pako).

Alea K është një kompani e dedikuar ndaj kultivimit të kamomilit dhe grurit organik në përputhje me standardet më të larta të bujqësisë organike. Me një sipërfaqe të madhe bujqësore dhe një përkushtim të veçantë për praktika të qëndrueshme, procesi i prodhimit në Alea K mbështetet vetëm në teknika të miratuara për kultivimin organik. Fara e përdorur është e zgjedhur me kujdes dhe i nënshtrohet udhëzimeve të vazhdueshme të kompanisë blerëse, për të siguruar cilësi të lartë dhe natyrshmëri. Parcela ndodhet larg burimeve të ndotura dhe nuk ka pasur përdorim të pesticideve, duke ofruar një ambient të pastër dhe të sigurt për bimët.

Kooperativa Rrenza është themeluar në prill të vitit 2022 dhe që nga themelimi është e certifikuar me standardin organik bi-OS, në përputhje me Regulloren Organike të BE-së (Regullorja (EU) 2018/848). Kooperativa përbëhet nga fermerë të cilët merren me kultivimin e bimëve mjekuese dhe aromatike (BMA). Llojet e bimëve që kultivohen ndryshojnë nga viti në vit, në përputhje me praktikat e qarkullimit bimor për të ruajtur cilësinë e tokës dhe biodiversitetin. Kultivimi realizohet në parcelat e vetë fermerëve, ndërsa pas tharjes, produkti përfundimtar tregtohet.

Kompania Bliff Organik u themelua në vitin 2016, me qëllimin që ti ofroj tregut Kosovarë për herë të parë çajra 100% organik të kualitetit më të lartë të certifikuar me standardin ekuivalent BIO -Non-Eu Agriculture XK-BIO 161.E veçantë e produkteve tona është percjellja zingjir nga kultivimi e deri në përpunim final.Bliff Organik u lansua në treg në Nentor të vitit 2019, fillimisht lansuam 7 lloje të produkteve filter, dhe pas një viti të suksesshëm, në vititn 2020 lansuam edhe produktet refuz, ndërsa sot kemi gjithësej 22 lloje të produkteve, duke punuar vazhdimisht në shije te reja.

Buta Group Sh.P.K. është një kompani bujqësore nga fshati Lupç i Epërm, Komuna e Podujevës, e specializuar në kultivimin e mjedrës. Kompania ka filluar aktivitetin e saj në vitin 2015 dhe sot menaxhon një sipërfaqe prej 3.5 hektarësh të mbjellë me mjeder. Prodhimi kryesor është mjedra e freskët, e cila shitet në tregun vendor dhe rajonal, duke ofruar cilësi të lartë dhe standarde që përmbushin kërkesat e konsumatorëve. Kapaciteti mesatar i prodhimit arrin rreth 40 tonë në vit, duke e pozicionuar kompaninë si një ndër prodhuesit e qëndrueshëm në këtë sektor. Me përvojë mbi një dekadë dhe përkushtim ndaj zhvillimit të bujqësisë, Buta Group Sh.P.K. synon të forcojë pozitën e saj në treg, të zgjerojë kapacitetet dhe të kontribuojë në zhvillimin rural të komunës së Podujevës.

Organic Farm Malesia operon që nga viti 2018 në sektorin e bujqësisë, ndërsa me prodhimtarinë organike ka filluar nga viti 2020. Kompania është e fokusuar në kultivimin, tharjen dhe përpunimin e bimëve mjekësore dhe aromatike (BMA), duke ndjekur parimet e bujqësisë së qëndrueshme dhe miqësore me mjedisin. Produktet tona kultivohen në kushte natyrore, pa përdorimin e pesticideve apo plehrave kimike, duke garantuar cilësi të lartë dhe përputhshmëri me standardet ndërkombëtare. Jemi të certifikuar me Rregulloren e BE-së për bujqësinë organike (848/2018), dhe aktualisht jemi në proces të zgjerimit të kapaciteteve tona për të përmbushur kërkesat e tregjeve ndërkombëtare.

Kompania kultivon gjithsej 5 hektarë me fruta të imëta, të strukturuara në mënyrë të sistematizuar dhe të menaxhuara me standarde bashkëkohore të prodhimit. Sipërfaqja është e ndarë si vijon: 3 hektarë me boronicë (Vaccinium corymbosum), të mbjella në kushte të kontrolluara, me sistem modern të ujitjes dhe plehërimit, të përshtatura për tregun e freskët dhe të përpunuar; 1.7 hektarë me mjedër (Rubus idaeus), të menaxhuara në parcela të strukturuara që sigurojnë rendiment të lartë dhe cilësi të qëndrueshme të produktit; 0.3 hektarë me manaferra (Rubus fruticosus) dhe dredhëza (Fragaria × ananassa), të dedikuara për tregun lokal dhe për prodhim të specializuar me vlerë të shtuar. Të gjitha sipërfaqet janë të pajisura me infrastrukturë moderne bujqësore, duke përfshirë rrjet ujitjeje pikë më pikë, mbrojtje nga faktorët klimatikë dhe ambiente për ruajtje pas korrjes, duke garantuar gjurmueshmëri dhe freski maksimale të produktit. Kompania është e përkushtuar ndaj praktikave të qëndrueshme bujqësore, duke kombinuar përvojën me inovacionin për të ofruar fruta të cilësisë së lartë për tregjet vendore dhe ndërkombëtare.

Arti Fruit është një kompani e specializuar në kultivimin dhe tregtimin e frutave të aronisë. Me një përkushtim të veçantë ndaj bujqësisë së qëndrueshme dhe cilësisë së lartë, kompania ka krijuar kushte optimale për rritjen dhe prodhimin e këtyre frutave unike, duke garantuar produkte të shëndetshme dhe me vlera të larta ushqyese.

ARONICA është një kompani e specializuar në përpunimin e lëngut të aronisë dhe produkteve të saj. Me fokus në cilësi dhe natyralitet, produktet tona përgatiten nga fruta të përzgjedhura me kujdes, duke ruajtur vlerat ushqyese dhe antioksidante. Pa ngjyrues dhe konservues artificialë, ARONICA sjell produkte natyrale që mbështesin një stil jetese të shëndetshëm.

Nature’s Pride është një kompani e specializuar në përpunimin e uthullës së mollës së egër, e themeluar në vitin 2022 me seli në Gjakovë. Kompania fokusohet në prodhimin e produkteve natyrale me cilësi të lartë, duke respektuar proceset tradicionale të fermentimit dhe standardet moderne të sigurisë ushqimore. Uthulla e mollës së egër e Nature’s Pride fermentohet deri në perfeksion, me kujdes dhe përkushtim të veçantë për çdo fazë të procesit, për të ruajtur vlerat ushqyese dhe përfitimet shëndetësore të produktit. Produkti paketohet në shishe qelqi prej 500 ml dhe është i kontrolluar dhe i monitoruar nga Agjencia e Ushqimit dhe Veterinarisë e Kosovës (AUV), duke garantuar cilësi dhe siguri për konsumatorin. Nature’s Pride synon të pozicionohet si një markë në treg, e dedikuar për konsumatorët që vlerësojnë shëndetin, natyrën dhe produktet autentike, të prodhuara me përgjegjësi dhe përkushtim ndaj mjedisit.

BioFruti është një kompani që vepron në sektorin e Bimëve Mjekësore dhe Aromatike (BMA) dhe Produkteve Pyjore Jo Drusore (PPJD), e fokusuar në kultivimin dhe përpunimin e bimëve mjekësore dhe aromatike. Kompania është themeluar në vitin 2017 dhe për tre vite radhazi ka qenë e përfshirë në skemën e certifikimit organik, duke zbatuar standarde të qëndrueshme dhe miqësore me mjedisin. BioFruti është një kompani e udhëhequr nga një grua dhe ka një rol të rëndësishëm në fuqizimin ekonomik të grave në zonë, duke angazhuar një numër të konsiderueshëm të grave si në procesin e kultivimit ashtu edhe në aktivitetet e tjera të prodhimit dhe përpunimit. Aktiviteti kryesor i kompanisë përqendrohet në kultivimin e bimëve njëvjeçare, siç janë mëllaga dhe kalendula, si dhe në bimë shumëvjeçare si menta dhe melisa, të cilat kultivohen me kujdes për të siguruar cilësi të lartë dhe përputhshmëri me kërkesat e tregut për produkte natyrale dhe organike.

Pure Product është një kompani e themeluar në vitin 2024, e cila merret me kultivimin e pemëve të imëta me fokus në dredhëza dhe mjedra. Kultivimi realizohet si në fushë të hapur, ashtu edhe në mjedise të mbrojtura (sera dhe tunele), duke mundësuar prodhim të qëndrueshëm dhe me cilësi të lartë gjatë gjithë sezonit. Kompania ka ndërtuar modelin e saj të biznesit mbi parimet e cilësisë, freskisë dhe besueshmërisë, duke furnizuar kryesisht tregun e brendshëm me produkte të freskëta dhe të shëndetshme. Që nga themelimi, Pure Product ka synuar të jetë një partner i besueshëm për konsumatorët dhe tregtarët lokalë, duke u fokusuar në mbështetjen e bujqësisë vendore dhe në ofrimin e produkteve të standardizuara. Përmes investimeve në teknologji moderne të kultivimit dhe kujdesit profesional për bimët, kompania po kontribuon në rritjen e cilësisë së prodhimit bujqësor në Kosovë. Në planet e saj afatmesme, Pure Product synon të zgjerojë kapacitetet prodhuese, të hyjë në tregje rajonale dhe të rrisë gamën e produkteve me kultura të tjera të pemëve të imëta.

BioRrita është një kompani e themeluar në vitin 2022, e cila vepron në fushën e kultivimit të bimëve mjekësore dhe aromatike (BMA), si dhe në përpunimin e tyre në produkte natyrale me vlerë të shtuar. Aktiviteti i kompanisë përfshin prodhimin e vajrave natyralë, sapunëve dhe kremrave, duke u bazuar në praktika të qëndrueshme dhe cilësi të lartë të lëndës së parë. Pronarja e BioRrita-s ka përvojë shumëvjeçare në kultivimin e bimëve mjekësore dhe aromatike, ndërsa në vitin 2022 ka zgjeruar aktivitetin e saj duke filluar përpunimin e tyre dhe operimin formal si biznes. BioRrita synon të ofrojë produkte natyrale, të sigurta dhe cilësore, duke kontribuar në zhvillimin e bujqësisë së qëndrueshme dhe promovimin e produkteve vendore.

Eurofruti L.L.C. u themelua në vitin 2001 në Mramor – Prishtinë, por operon nga vitet e 70'ta si biznes familjar dhe është një nga kompanitë lidere në Kosovë në fushën e grumbullimit, përpunimit dhe eksportit të frutave të imta, kërpudhave dhe produkteve të ngrira. Me mbi 23 pika grumbullimi dhe bashkëpunim me mbi 1000 fermerë të kontraktuar, kompania ka ndërtuar një rrjet të fuqishëm furnizimi në Kosovë dhe rajon. Kapacitetet e saj përfshijnë linja moderne përpunimi me teknologjinë IQF, kapacitet ngrirjeje deri në 30 ton/ 24 orë dhe kapacitet ruajtjeje mbi 2 500 tonë në depo frigoriferike, të pajisura me teknologji të avancuar për sortim me lazer, pastrim dhe paketim sipas standardeve ndërkombëtare. Produktet e Eurofrutit përfshijnë fruta të ngrira si mjedra, boronica, dredhëza, manafera, vishnje e kumbulla, si dhe kërpudha të ngrira dhe të freskëta si Boletus edulis dhe Cantharellus cibarius. Krahas paketimit industrial për eksport, kompania ka zhvilluar edhe paketime të vogla për tregun fundor përmes markës së saj Minus Zero Foods, e cila u lançua në vitin 2024 dhe ofron fruta të ngrira premium në pako 450 g dhe produkte të tjera të zgjedhura për zinxhirë supermarketesh në tregjet vendore dhe ndërkombëtare.

JONI-SH Sh.P.K. – Themeluar në vitin 2015 në Ballofc, Podujevë, Joni-SH është kompani e specializuar në grumbullimin, përpunimin dhe paketimin e mjedrës, dredhëzës dhe boronicës. Me kapacitete moderne të ruajtjes deri në 2,000 tonë dhe standarde të larta të sigurisë ushqimore, kompania eksporton poashtu produktet e saj të ngrira në tregjet vendore dhe ndërkombëtare nën markën JFrosty, duke garantuar cilësi të lartë dhe shije natyrale për konsumatorët. Falë përvojës së saj dhe besimit të partnerëve, Joni-SH është shndërruar në një nga aktorët kryesorë në sektorin e frutave të ngrira në Kosovë, duke kontribuar në zhvillimin e bujqësisë dhe ekonomisë lokale.

BOTANIC është një kompani vendore e certifikuar organike që promovon praktikat e bujqësisë rigjenerative në Kosovë, me fokus në sektorin e përpunimit të ushqimit. Kompania aktualisht operon me markën “Into the Wild”, e cila deri më tani përfshin 10 lloje çajrash organikë të përgatitur nga fruta të egra dhe bimë mjekësore/aromatike, si dhe kërpudha të egra të llojit Boletus, të kultivuara dhe të mbledhura nga malet dhe natyra e Kosovës. BOTANIC synon të ofrojë produkte të shëndetshme, pa mbetje kimike, duke reduktuar njëkohësisht gjurmën e karbonit në bujqësi dhe në konsumin e ushqimit.

Pelini`s është një kompani e përkushtuar në përpunimin e frutave arrore, duke u mbështetur në përvojën dhe ekspertizën e tyre për të ofruar një gamë të gjerë produktesh të shëndetshme. Ndër produktet kryesore të kompanisë janë gjalpi i kikirikut dhe gjalpi i lajthisë, të cilët prodhohen me kujdes për të ruajtur cilësinë dhe vlerat ushqyese të përbërësve natyralë. Përveç kësaj, Pelini ka zgjeruar veprimtarinë edhe në prodhimin e vajit të farës së zezë, një produkt i njohur për vetitë e tij të fuqishme ushqyese dhe përfitimet shëndetësore. Me një përkushtim të thellë ndaj cilësisë, kompania synon të sjellë produkte të shëndetshme dhe të dobishme për tregun. Duke ruajtur traditën dhe autenticitetin në përpunimin e produkteve, Pelini i përshtatet gjithashtu standardeve të tregut modern dhe kërkesave për siguri ushqimore.

Agro Shqiponja është një kompani bujqësore e vendosur në fshatin Tërpezë të komunës së Malishevës, e specializuar në grumbullimin dhe përpunimin e bimëve mjekësore, aromatike dhe frutave të egra. Duke bashkëpunuar me mbi 100 fermerë të kontraktuar me marrëveshje afatgjata, kompania ka mbjellë mbi gjysmë milioni fidanë në komunat përreth, duke kontribuar në zhvillimin ekonomik lokal dhe krijimin e vendeve të reja të punës.

Organic Herb SH.P.K. është një kompani familjare me seli në fshatin Sigë, komuna e Pejës, e themeluar në vitin 2016. E specializuar në kultivimin, mbledhjen dhe përpunimin e bimëve mjekësore dhe aromatike, si dhe frutave të egra, kompania ofron produkte organike të cilësisë së lartë, duke përfshirë çajra, erëza dhe vajra esencialë. Me një laborator të pajisur me teknologji moderne për përzgjedhjen, pastrimin dhe prerjen e bimëve, Organic Herb ndjek standardet HACCP për të siguruar cilësinë dhe sigurinë e produkteve të saj. Kompania është e certifikuar sipas standardeve ISO 9001 dhe ka certifikime organike nga Control Union dhe Bio Suisse.